Pretendentu dasaceišona BOŅUKS 2016

Suokusēs pretendentu dasaceišona Latgalīšu kulturys goda bolvai „Boņuks 2016” par sasnāgumim i padareitū latgalīšu kultūrā 2016. godā. Bolvu sajiemieji tiks nūskaidruoti svineigā ceremonejā 2017. goda 26. februarī, pasnādzūt tuos jau deveitū reizi. „Boņuks” ir vīneiguo bolva, kas eipaši izceļ i gūdynoj sasnāgumus latgalīšu kulturys dzeivē.
 
Latgalīšu kulturys goda bolvys „Boņuks” mierkis ir veicynuot latgalīšu kulturvidis saglobuošonu i atteisteibu, kai ari apkūpuot i gūdynuot spylgtuokūs i nūzeimeiguokūs sasnāgumus latgalīšu kultūrā pārnejuo goda grīzumā. 2016. goda bolvai pretendentu dasacejumi teik pījimta 18 nominacejuos, kas atsatīc iz sabīdryskūs aktivitašu, muzykys i literaturys laukim.
 
Aizpiļdeitys dasacejuma anketys bolvai „Boņuks 2016” elektroniskā formatā, pa postu voi aizpiļdeitys tīšsaistis dasacejuma veidā Latgolys viestnīceiba GORS gaideis da 2017. goda 11. janvara. Dasacejumus izvērtēs kompetenta žureja sovu sferu profesionaļu sastuovā.
 
Pārn bolvys par padareitū, sasnāgumim voi aktivitati latgalīšu kulturā 2016. godā sajieme tielnīks Glebs Pantelejevs par izstuodi „Latgales rapsodija”, tulkuotuojs Guntars Godiņš par gruomotu „Ludzas igauņu pasakas”, grupa „Dabasu Durovys”, grupa “Tautumeitas”, etnoroka grupa „Laimas muzykanti”, dzīsminīks Aņss Ataols Bierzeņš, Kuorsovys nūvoda pošvaļdeiba par latgalīšu volūdys populariziešonu, Lūznovys muiža, varganiste Iveta Apkalna, gruomotys „Alise Breinumu zemē” latgaliskais izdavums i cyti. Bolvu par myuža īguļdejumu latgalīšu kulturā itūgod sajieme katuoļu pravests, kulturviesturnīks i sabīdryskais darbinīks Alberts Budže.
 
Latgalīšu kulturys goda bolvys „Boņuks 2016” nūtikšonu atbolsta Vaļsts kulturkapitala fonda Latgolys kulturys programa ar A/S „Latvijas valsts meži” atbolstu, Rēzeknis piļsātys dūme i Latgolys regiona pošvaļdeibys. Informativī atbaļsteituoji: žurnals „Ir”, Latgalīšu kulturys gazeta lakuga.lv, Latgolys radeja, gazetys „Vaduguns” i „Latgales Laiks”.